Hövzə Xəbər Agentliyinin verdiyi məlumata görə, həzrət Ayətullah üzma Nuri Həmədani bu gün Məhkəmə Hakimiyyətinin sədri Höccətül-İslam vəl-müslimin Qulamhüseyn Möhsüni Ejei ilə görüşdə onu yenidən bu vəzifəyə təyin olunması münasibətilə təbrik edib, İslam İnqilabının Ali Məqamlı Rəhbərinin ona göstərdiyi etimada görə təşəkkürünü bildirib və bu etimadı Məhkəmə Hakimiyyəti sədrinin öhdəliyinin, səriştəsinin və fəaliyyət qabiliyyətinin göstəricisi adlandırıb.
Bu təqlid mərcəsi Məhkəmə Hakimiyyətinin mühüm mövqeyini vurğulayaraq bildirib: Məhkəmə Hakimiyyəti insanların problem və çətinliklərlə üzləşdiyi zaman son sığınacağıdır. Buna görə də ədalətin bərqərar olunması və xalqın hüquqlarının qorunması daim bu qurumun fəaliyyətinin başlıca istiqaməti olmalıdır.
O, əlavə edib ki, ədalətin olmadığı cəmiyyət İslam cəmiyyəti sayıla bilməz və vurğulayıb: Məhkəmə sistemi xalqın hüquqlarını qətiyyətlə müdafiə etməli, ölkənin təhlükəsizliyini və iqtisadiyyatını pozan şəxslərə qarşı ciddi və qəti tədbirlər görməlidir.
Həzrət Ayətullah üzma Nuri Həmədani daha sonra ölkənin həssas şəraitinə və hegemon qüvvələrin davamlı düşmənçiliyinə toxunaraq milli birliyin qorunmasını strateji zərurət adlandırıb və bildirib: Bu gün İran İslam Respublikası ən xəbis düşmənlərlə üz-üzədir. Buna görə də İslam İnqilabının Ali Rəhbərinin vurğuladığı birliyi zəiflədən və ya İslam Respublikası sisteminə xidmət edən şəxsləri hədəfə alan hər bir addım və ya söz, əslində düşmənə xidmət etmək deməkdir.
O, bununla yanaşı, ədalətli və insaflı tənqidin zəruri olduğunu bildirib və əlavə edib: Düşmənin sui-istifadəsinə şərait yaratmayan konstruktiv və ədalətli tənqid nəinki qəbulediləndir, hətta işlərin yaxşılaşmasına da kömək edə bilər.
Həzrət Ayətullah üzma Nuri Həmədani həmçinin Ali Məqamlı Rəhbərin göstərişlərinə tabe olmaqda ölkənin üç hakimiyyət qolunun rəhbərləri arasında mövcud olan birlik və həmrəyliyi yüksək qiymətləndirərək bildirib: Mən cənab Möhsüni Ejeini uzun illərdir tanıyıram. Onu dindar, xalqa xidmət edən və uğurlu bir şəxs hesab edirəm. İnanıram ki, son illərdə Məhkəmə Hakimiyyətində müsbət dəyişikliklər baş verib. Biz onun fəaliyyətini dəstəkləyirik və daim uğurları üçün dua edirik.
O, həmçinin Qum vilayətinin məhkəmə işçilərinin xidmətlərini yüksək qiymətləndirərək, vilayətin Baş Ədliyyə İdarəsinin rəisinin fəaliyyətini təqdir edib və xalqa layiqli xidmətin davam etdirilməsinin vacibliyini vurğulayıb.
Həzrət Ayətullah üzma Nuri Həmədani sonda Məhkəmə Hakimiyyətinin sədrinə uğurlar arzulayıb, uca Allahdan ona izzətli və bərəkətli ömür, İslam Respublikasına və xalqa daha çox xidmət etmək üçün müvəffəqiyyət nəsib etməsini diləyib.
Görüşün əvvəlində Məhkəmə Hakimiyyətinin sədri Höccətül-İslam vəl-müslimin Möhsüni Ejei də məhkəmə sisteminin fəaliyyəti və gələcək proqramları barədə hesabat təqdim edib.
Məhkəmə Hakimiyyətinin sədri, həmçinin həzrət Ayətullah üzma Nuri Həmədaninin İslam İnqilabı və İslam Respublikası sisteminə verdiyi dəstəyi yüksək qiymətləndirib, onun tövsiyə və təkliflərinə görə təşəkkürünü bildirib.
Xəbərin sonu.
Rəyiniz